ԼՈՂՈՐԴՆԵՐԻ << ՇՈԳ >> ԱՄԱՌԸ
Հայաստանի լողի ֆեդերացիայի գլխավոր քարտուղար Ռաֆաել Վասիլյանը մեր խնդրանքով ներկայացրեց մրցաշրջանի իրենց ծրագրերը:
Մարտի 23 –ից հավաքականը երկշաբաթյա ուսումնամարզական հավաք կանցկացնի Ծաղկաձորում: Կհաջորդի ՀՀ ապրիլյան առաջնությունը, որի արդյունքներով կճշտվեն տարիքային տարբեր խմբեր ներկայացնող թիմերի կազմերը:
Հուլիսին պատանի լողորդները Բելգրադում կմասնակցեն Եվրոպայի, իսկ ազգային թիմը Ճապոնիայի Ֆուկուոկա քաղաքում ՝ աշխարհի առաջնություններին: Նույն ամսին Սլովենիայում, Եվրոպայի ամառային օլիմպիական պատանեկան փառատոնում կներկայանան նաև մեր պատվիրակները: Ասածին եթե հավելենք այն, որ նշած ժամանակաշրջանում Գյումրի, Վանաձոր և Իջևան քաղաքներում զուգահեռաբար կանցկացվեն համապետական մի շարք մրցաշարեր,ապա կարելի է ենթադրել, որ մեր լողորդներին հիրավի << շոգ >> ամառ է սպասվում:
Լուրջ << քննությունները >> կշարունակվեն նաև հաջորդ ամիսներին, ստույգ ՝ մինչև տարեվերջ: Հոկտեմբերին կապույտ լողուղյակներում կմրցեն պատանեկան, նոյեմբերին ՝ մինչև 14 տարեկանների ՀՀ առաջնությունների մասնակիցները: Վերջին ՝ դեկտեմբեր ամսին, Եվրոպայի առաջնության ծրագրով Բուխարեստի կարճ ջրում / 25մ. լողավազանում / կվիճարկվեն Եվրոպայի առաջնության մեդալները: Դրանից օրեր անց, մեր պատվիրակները Ս.Պետերբուրգում կպայքարեն օլիմպիական չեմպիոն Վլադիմիր Սալնիկովի անվան մրցանակների համար: Տարեմուտին վերջապես իրարու կհավաքվեն երկրի լողորդ- լողորդուհիները և կվիճարկեն մարզաձևի ՀՀ դաշնության գավաթը, որի ավարտից հետո միմյանց կշնորհավորեն շահած մրցանակների և, իհարկե, գալիք ամանորի առթիվ :
Իբրև վերջաբան ասենք, որ աշխարհի առաջնությունում / Ֆուկուոկա / կխաղարկվեն << Փարիզ – 2024 >> –ի ուղեգրեր: Իհարկե, վարկանիշային այլ մրցաշարեր էլ կան, որոնց արժանանալու համար կպայքարեն նաև մեր երկրի ներկայացուցիչներ Արթուր Բարսեղյանը, Աշոտ Չախոյանը, Լևոն Քոչարյանը, Անի Պողոսյանը, Վարսենիկ Մանուչարյանը, Եվա Կարապետյանը և էլի մի քանիսը:
Հավելենք, որ մրցաշրջանում չափազանց ծանր ու պատասխանատու աշխատանք է սպասվում հավաքականի գլխավոր մարզիչ, բազմափորձ Միսակ Գաբրիելյանին և նրա ղեկավարած մարզչական խորհրդին:
